Heimsóknir í fangelsi
Um heimsóknir í fangelsi fer skv. lögum um fullnustu refsinga nr. 49/2005, reglugerðum settum samkvæmt þeim og reglum sem fangelsin setja.
Í 33. grein laga um fullnustu refsinga nr. 49/2005 segir:
Fangi getur fengið heimsóknir í fangelsi, eigi sjaldnar en vikulega eftir aðstæðum í fangelsi.
Forstöðumaður fangelsis getur leyft frekari heimsóknir og hvort fleiri en einn mega heimsækja fanga hverju sinni.
Ef sérstakar ástæður eru fyrir hendi getur forstöðumaður ákveðið að heimsóknir tiltekinna manna fari fram undir eftirliti starfsmanns eða í öðrum vistarverum fangelsis, sbr. 34. og 35. gr. laga nr. 49/2005, eða með því að banna líkamlega snertingu gests og fanga, enda sé ástæða til að ætla að heimsóknin verði misnotuð eða trufli ró, reglu eða öryggi í fangelsi.
Forstöðumaður getur bannað tilteknum mönnum að heimsækja fanga, enda liggi fyrir rökstuddur grunur um þær ástæður sem í 3. mgr. greinir. Slíka ákvörðun skal rökstyðja skriflega.
Fangi getur neitað að þiggja heimsóknir annarra en þeirra sem eiga við hann opinber erindi. Munir eða efni sem gestur hefur meðferðis og sem fanga er óheimilt að hafa í fangelsi skulu vera í vörslum fangelsis meðan á heimsókn stendur.
Heimilt er að leita á þeim sem heimsækja fanga. Leit getur annars vegar verið í ytri fötum og hins vegar líkamsleit, enda samþykki heimsóknargestur það. Samþykki hann það ekki má láta heimsóknina fara fram með öðrum hætti, sbr. 3. mgr. eða synja um hana, sbr. 4. mgr.
Reglur fyrir heimsóknargesti fanga.
Þeim sem heimsækja fanga í fangelsi er vinsamlegast bent á eftirfarandi:
-
Heimsóknargestur getur ekki sjálfur átt frumkvæði að heimsókn til fanga, heldur þarf viðkomandi fangi að sækja um heimsóknarleyfi og tíma á þar til gerðu eyðublaði.
-
Heimsóknargestur þarf að hafa með sér skilríki og sýna fangavörðum ef um er beðið. Geti gestur ekki framvísað persónuskilríkjum er fangavörðum heimilt að vísa honum frá.
-
Óheimilt er að koma með farsíma eða önnur síma- eða boðtæki í heimsókn í fangelsi.
-
Ekki er leyfilegt að koma með matvæli eða drykkjarvörur til fanga í heimsóknartímum.
-
Bannað er að koma með áfengi, lyf eða önnur vímugefandi efni inn í fangelsið. Fangavörðum er heimilt að vísa heimsóknargesti frá ef hann er undir áhrifum áfengis eða annarra vímuefna.
-
Peninga, fatnað og aðra muni sem föngum eru ætlaðir, skal afhenda fangavörðum við komu í fangelsið.
-
Heimsóknargestir geyma handtöskur, veski og aðra lausamuni í læstu geymsluhólfi meðan á heimsókn stendur.
-
Börn yngri en 18 ára skulu vera í fylgd foreldris eða forráðamanns.
-
Aðstandendum og verðandi heimsóknargestum er bent á að snúa sér til varðstjóra fangelsis óski þeir eftir frekari upplýsingum um heimsóknir til fanga.
Athygli er vakin á því að brot á þessum reglum geta orsakað heimsóknarbann auk þess sem refsiverð athæfi eru kærð til lögreglu.